Сагаалганай hайндэртэ дашарамдуулан, хүүгэдэй сэсэрлигүүдэй багшанарай дунда "Хатан-Дангина-2022" гэhэн хотын мүрысөөн үнгэрбэ. Эндэ буряад хэлэтэй, буряад арадай ёhо заншалнуудаар hонирходог, сахидаг хори наhанhаа жара хүрэтэр ямаршье яhанай эхэнэрнүүд хабаадаха аргатай байба .
Бүхыдөө мүрысөөн гурбан шатаhаа бүридэжэ, иимэ даабаринуудые хабаадагшад дүүргэхэ уялгатай байба :
1. «Угаа хүндэлэн залгуулая» гэhэн сэдэбээр өөр тухайгаа, уг гарбал, үндэр нэрэ зэргэтэй, суута түрэлхид, түрэhэн үдэhэн тоонто тухайгаа хөөрэхэ;
2. «Би бэлиг талаантайб» гэhэн шатада зохёохы алибаа hалбаряар бэлиг шадабарияа дүүрэн харуулха;
3. «Буряад эдеэн дэлгэрэг!» гэhэн даабари дүүргэхэдээ, буряад арадай сагаан эдеэ, мяхан, талхан табагуудые хайшан гэжэ гэртээ бэлдэдэгээ шэмэглэн дурадхаха.
Энэ мүрысөөндэ манай хүүгэдэй сэсэрлигэй 1-дэхи монолингвальна «Галхан» гэhэн бүлэгэй хүмүүжүүлэгшэ Дэнсэма Базарсадуевна Чимитдоржиева эдэбхитэйгээр хабаадажа, «Би бэлиг талаантайб» гэhэн номинациин илагша боложо шалгараа.
Дэнсэма Базарсадуевна хадаа хэбэд номхон Хэжэнгын Могсохон нютагhаа гарбалтай. Ажалша малша бүлэдэ мүндэлжэ, бага балшар наhанhаа ажал хүдэлмэриhөө сухариха гэжэ мэдэхэгүй, номгон даруу зантай, уужам дэлгэр сэдьхэлтэй, хонгёо hайхан хоолойтой ёhотой буряад басаган гэжэ тэмдэглэмээр. Дэнсэма Базарсадуевна - харюусалгатай, эрмэлзэлтэй хүмүүжүүлэгшэ, гурбан бэрхэ хүүгэдэй энхэргэн эжы, найдамтай наhанай нүхэр. Гэр бүлөөрөө уhан буряад хэлэн дээрээ харилсажа, угсаата буряад арадайнгаа ёhо заншалнуудые сахижа, хүүгэдээ дүрбэн тэгшээр hургажа, хүмүүжүүлжэ ябахадаа, ёhотойл буряад эхэнэрэй, эхын жэшээтэ дүрэ болон тодорно.
Саашанхи ажабайдал ажал хоёртонь амжалта, арюун сэбэр харгы хүсэе!